საქართველოს ადვოკატები დამოუკიდებელი პროფესიისათვის – მონაწილეობა მე-11 საერთაშორისო საზაფხულო სკოლაში Medical Law and Bioethics

გასულ კვირას საქართველოს ადვოკატები დამოუკიდებელი პროფესიისათვის თავმჯდომარემ, სამართლის დოქტორმა ნინო ლიპარტიამ და გამგეობის წევრმა, სამართლის დოქტორმა იოსებ გაბარაევმა მიიღეს მონაწილეობა მე-11 საერთაშორისო საზაფხულო სკოლაში Medical Law and Bioethics, რომელიც დაიგეგმა საბერძნეთში, თესალონიკის არისტოტელეს უნივერსიტეტში. ნინო ლიპარტიამ და იოსებ გაბარაევმა საერთაშორისო აუდიტორიის წინაშე წარადგინეს მოხსენება თემაზე: „სამედიცინო ხელოვნური ინტელექტის სისტემების სამართლებრივი პასუხისმგებლობა: ვინ აგებს პასუხს, როდესაც სამედიცინო AI შეცდომას უშვებს?” მოხსენების დროს განხილული იქნა ხელოვნური ინტელექტის გამოყენების სამართლებრივი გამოწვევები ჯანდაცვის სფეროში, სამოქალაქო და სისხლისსამართლებრივი პასუხისმგებლობის გამიჯვნის საკითხები, სამედიცინო AI სისტემების შეცდომებით გამოწვეული ზიანის სამართლებრივი შეფასება, ასევე ექიმების, სამედიცინო დაწესებულებების, პროგრამული უზრუნველყოფის შემქმნელებისა და AI სისტემების მწარმოებლების პასუხისმგებლობის ფარგლები. განსაკუთრებული ყურადღება დაეთმო საერთაშორისო სამართლებრივ და ეთიკურ ჩარჩოებს, მათ შორის გაეროს, ჯანდაცვის მსოფლიო ორგანიზაციის (WHO), UNESCO-ს, ევროკავშირის და ევროპის საბჭოს სტანდარტებს. GLIP აფასებს საერთაშორისო აკადემიურ და პროფესიულ სივრცეში აქტიურ თანამშრომლობასა და ცოდნის გაზიარებას, რაც ხელს უწყობს სამედიცინო სამართლისა და ხელოვნური ინტელექტის სამართლებრივი რეგულირების თანამედროვე გამოწვევებზე საერთაშორისო დიალოგის განვითარებას. ვულოცავთ ჩვენს კოლეგებს ღირსეულ მონაწილეობას საერთაშორისო ფორუმზე და მადლობას ვუხდით ღონისძიების ორგანიზატორებს მაღალი დონის აკადემიური პლატფორმის შექმნისათვის.