საქართველოს ადვოკატები დამოუკიდებელი პროფესიისათვის: სასწავლო ვიზიტი ჰააგაში

საქართველოს ადვოკატები დამოუკიდებელი პროფესიისათვის და იურიდიული პროფესიის განვითარების ცენტრი 18-27 ივნისს აორგანიზებს სასწავლო ვიზიტს ნიდერლანდების ქალაქ ჰააგაში. სასწავლო ვიზიტის განმავლობაში მონაწილეებს შესაძლებლობა ეძლევათ გაეცნონ საერთაშორისო სამართლის წამყვან ინსტიტუტებს, მათ შორის ჰააგის საერთაშორისო კერძო სამართლის კონფერენციას (HCCH), საერთაშორისო სასამართლოს (ICJ) და საერთაშორისო სისხლის სამართლის სასამართლოს (ICC). Hague Conference on Private International Law-ის ფარგლებში განხილული იქნება HCCH-ის როლი და ფუნქციები საერთაშორისო კერძო სამართლის კონტექსტში, ასევე ჰააგის კონვენციების გავლენა საერთაშორისო სამოქალაქო და კომერციულ ურთიერთობებზე. განსაკუთრებული ყურადღება დაეთმობა 1980 წლის ჰააგის კონვენციას ბავშვთა საერთაშორისო გატაცების შესახებ, მის პრაქტიკულ განხორციელებას, პროცედურულ სირთულეებსა და ძირითად გამოწვევებს, ბავშვთა დაბრუნების მექანიზმებსა და ცენტრალური ორგანოებს შორის თანამშრომლობას. საერთაშორისო მართლმსაჯულების სასამართლოში მონაწილეები გაეცნობიან სასამართლოს მანდატსა და ფუნქციებს, სახელმწიფოთაშორისი დავების განხილვის პროცედურებსა და სასამართლოს პრაქტიკას, მათ შორის მნიშვნელოვან საქმეებს. საერთაშორისო სისხლის სამართლის სასამართლოს ფარგლებში განხილული იქნება სასამართლოს მანდატი და იურისდიქცია, მათ შორის ძირითადი საერთაშორისო დანაშაულები, საქმის წარმოების ეტაპები და პრაქტიკული ასპექტები. ეს გამოცდილება მნიშვნელოვნად შეუწყობს ხელს საერთაშორისო სამართლის სფეროში ცოდნის გაღრმავებას, პრაქტიკული უნარების განვითარებასა და პროფესიული კავშირების გაფართოებას.